Gæðasíld mokveiðist á síldarmiðunum
Gríðarmikið er af síld á Glettinganesgrunni og mokveiðist hún í augnablikinu. Um gæðasíld er að ræða eða eins og best verður á kosið.Fjallað er um málið á vefsíðu Síldarvinnslunnar. Þar segir að Margrét EA hafi komið til Neskaupstaðar á laugardagskvöld með 1150 tonn af síld. Fékkst síldin í tveimur holum, annað stóð í 105 mínútur og hitt í 115 mínútur.
„Það gekk eins og í sögu. Við stoppuðum í átta og hálfan klukkutíma á miðunum og fengum þessi 1150 tonn í tveimur 100 mínútna holum. Fyrra holið var 105 mínútur og hið seinna 110", segir Birkir Hreinsson skipstjóri á Margréti EA í samtali á vefsíðunni.
Hann segir einnig að á Glettinganesgrunni sé gríðarmikið af síld að sjá og engin vandræði að fá góðan afla. Síldin er líka eins og best verður á kosið. Hún er 420 grömm að meðaltali og algerlega átulaus.
„Þetta er eins gott hráefni til vinnslu og hugsast getur enda vorum við bara þrjá tíma á leiðinni í land og hráefnið getur vart verið mikið ferskara. Það verður búið að vinna aflann upp úr hádegi í dag,“ segir Birkir.
Farmur Margrétar er annar síldarfarmurinn sem berst til vinnslu í Neskaupstað á þessari nýbyrjuðu síldarvertíð. Börkur NK kom með fyrsta farminn sl. föstudag.
