Fluttur með sjúkraflugi eftir útafakstur á Háreksstaðaleið
Karlmaður um tvítugt var fluttur meðvitundarlaus með sjúkraflugi til Reykjavíkur eftir bílveltu á Háreksstaðaleið seinni partinn í gær.
Lögreglu barst tilkynning um slysið klukkan 16:40 í gær. Óttast var að slysið væri alvarlegt þar sem ökumaðurinn, sem var einn á ferð, var án meðvitundar.
Hann var sendur með sjúkrabíl til Vopnafjarðar og þaðan áfram til Reykjavíkur. Hann er enn á sjúkrahúsi þar undir eftirliti lækna en er mun minna slasaður en óttast var í fyrstu.
Slysið varð skammt frá afleggjaranum til Vopnafjarðar. Jeppabifreið mannsins virðist hafa farið út af veginum og oltið nokkrar veltur. Ökumaðurinn virðist ekki hafa verið í bílbelti og þess vegna kastast út úr bílnum.
Þær upplýsingar fengust hjá lögreglu að tildrög slyssins væru ókunn og því í rannsókn. Bíllinn er gjörónýtur.
Mynd: Aðsend