Ferðamenn dvelja skemur og fara síður út á land
Vísbendingar eru um að ferðamenn séu farnir að halda að sér höndum í Íslandsheimsóknum með minni neyslu og styttri ferðum. Það sést meðal annars á nýtingu hótelherbergja á Austurlandi. Talsverður vöxtur er í vöruútflutningi, einkum álafurðum og frá fiskeldi.Þetta kemur fram í samantekt um utanríkisverslun sem greiningardeild Arion-banka sendi frá sér nýverið.
Ferðaþjónustan heldur uppi þjónustuútflutningi en blikur eru á lofti vegna styrkingar krónunnar. Fjölgun ferðamanna er minni en spáð var og tekjur á hvern ferðamann eru minni.
Velta á hvern ferðamann hefur minnkað á nær öllum sviðum svo sem kaupum á menningu, veitingu, gistingu, ferðum og verslun annarri en dagvöruverslun. Ber það saman við frásagnir austfirskra ferðaþjóna, sem Austurfrétt hefur rætt við, um að ferðamenn kaupi inn í stórmörkuðum og nýti aðstöðu í gistingunni til að elda.
Í skýrslunni segir að sterkar vísbendingar hafi sést í fyrra um að ferðamenn dveljist styttra og heldur virðist hraða á þeirri þróun miðað við tölur af gistinóttum.
Nýting hótelherbergja á Austurlandi í janúar-apríl í ár var innan við 20%. Þótt hún hafi aukist um nokkur prósentustig milli ára er nýtingin samt minnst þegar landshlutarnir eru bornir saman, næst er Norðurland með 30% nýtingu. Á sama tíma er nýtingin á höfuðborgarsvæðinu 90%.
Talsverður vöxtur er í vöruútflutningi, sé litið framhjá sjómannaverkfallinu, sem skýrist aðallega af hærra álverði og mikilli aukningu á fiskeldi. Þá er verð sjávarafurða í erlendri mynt hátt um þessar mundir.
