Ferðafólk sótt á Möðrudalsöræfi
Austfirskar björgunarsveitir fóru í dag til aðstoðar ferðalöngum í fjórum bílum sem fastir voru á Möðrudalsöræfum.
Sveitirnar Vopni og Jökull fóru til aðstoðar fólkinu. Samkvæmt upplýsingum frá Vopna höfðu ferðamennirnir hvorki tekið mark á lokunarskiltum né því að vegurinn var merktur ófær í kortum Vegagerðarinnar.
Ellefu manns voru í bílunum og var fólkið flutt niður í Jökuldal en bílarnir skildir eftir.
Á Fáskrúðsfirði var björgunarsveit kölluð út þegar þakgluggi fauk upp á íþróttahúsinu. Þegar komið var á staðinn var glugginn farinn og opinu því lokað með plötu.
Þá var Ársól á Reyðarfirði tvíveigs kölluð út vegna ferðalanga á Fagradal í dag.
Mikið hvassviðri hefur ríkt í fjórðungnum frá því um hádegi. Gert er ráð fyrir að það gangi niður á morgun.