Færðu Fljótsdalshrepp reynitré að gjöf
Orkusalan, dótturfyrirtæki RARIK, færði nýverið öllum sveitarfélögum í landinu reynitré að gjöf í því skyni að minna á mikilvægi kolefnisbindingar.
Sveitarstjórn Fljótsdalshrepps tók mót sinni gjöf fyrir skömmu og var trénu plantað undir virku eftirliti allrar sveitarstjórnar við félagsheimilið Végarð. Þakkaði sveitarfélagið táknræna gjöf en ekki eru mörg ár síðan sérstök skýrsla sýndi að binding kolefnis innan sveitarfélagsins var jákvæð enda óvíða meiri skógrækt en þar um slóðir á landsvísu.
Orkusalan kolefnisjafnar alla sína eigin vinnslu en það gerir fyrirtækið í samstarfi við verkfræðistofuna EFLU sem heldur utan um alla losun með tilliti til daglegs reksturs, aksturs og flugferða.ð
Reynitrénu plantað á besta stað við Végarð í blíðskaparveðri. Mynd Gísli Örn Guðmundsson