Erfiðar aðstæður til leitar í Stafafellsfjöllum
Alls tóku níu manns frá björgunarsveitinni Báru á Djúpavogi þátt í leitinni að manninum í Stafafellsfjöllum í nótt og í morgun. Aðstæður til leitar voru erfiðar sökum veðurs en gul veðurviðvörun var í gangi á svæðinu meðan á leit stóð.Ingi Ragnarsson formaður Báru segir að fyrsti hópurinn frá þeim, fimm manns, hafi farið af stað eftir að tilkynningin barst um átta leytið í gærkvöldi. Snemma í morgun fóru svo fjórir menn til viðbótar á leitarsvæðið.
„Við tókum nýja drónann okkar með í fyrsta hópnum en það gekk erfiðlega að nota hann vegna rigningarinnar sem var á leitarsvæðinu. Vindurinn var minna vandamál“ segir Ingi.
Eins og fram hefur komið í fréttum fundu tveir smalar manninn er hann var kominn niður úr fjöllunum laust fyrir hádegið. Hann hafði látið fyrirberast í neyðarskýli um nóttina og var heill á húfi.
„Það var mjög slitrótt farsímasamband á þessu svæði endar er mikið af giljum og bröttum skoringum á svæðinu. Maðurinn átti því sennilega í erfiðleikum með að láta vita af sér,“ segir Ingi.
Fram kemur í máli hans að fyrsti hópurinn frá Báru hafi verið við leit þar til klukkan var að verða fjögur í nótt. Þeir fóru þá niður aftur til hvíldar og síðan tók seinni hópurinn við í leitinni.
„Það er ánægjulegt hve þessi leit endaði vel og að maðurinn var heill á húfi þegar hann fannst,“ segir Ingi.