Bæjarstjórn Fjarðabyggðar mótmælir lokun Húsasmiðjunnar á Reyðarfirði

Höfundur: Kristborg Bóel Steindórsdóttir • Skrifað: 02. nóvember 2018.

Eins og Austurfrétt greindi frá í vikunni hefur Húsasmiðjan ákveðið að loka verslun sinni á Reyðarfirði um næstu áramót. Forstjóri fyrirtækisins segir litlar einingar á borð við verslunina á Reyðarfirði eiga erfitt uppdráttar í harðri samkeppni. Til stendur að efla verslunina á Egilsstöðum.

Eftirfarandi bókun var lögð fram á 256. fundi bæjarstjórnar Fjarðabyggðar í gær.

„Bæjarstjórn Fjarðabyggðar mótmælir harðlega þeirri ákvörðun Húsasmiðjunnar að loka verslun sinni á Reyðarfirði. Það skýtur skökku við að fyrirtæki eins og Húsasmiðjan sjái sér ekki fært að reka verslun í sveitarfélagi eins og Fjarðabyggð þar sem langstærsti hluti veltu fyrirtækja á Austurlandi verður til. Eru þetta sérstök vonbrigði í ljósi fundar sem haldinn var að undirlagi Fjarðabyggðar með stjórnendum Húsasmiðjunnar í lok ágúst síðastliðnum þar sem kom fram að ekki stæði til að loka versluninni á Reyðarfirði heldur reyna að sækja frekar fram í rekstri hennar.

Sú mikla þjónustuskerðing sem nú fer fram, í boði stórfyrirtækja á landsvísu, og virðist helst beinast að landsbyggðinni er með öllu ólíðandi og hvetur bæjarstjórn Fjarðabyggðar stofnanir sveitarfélagsins og íbúa alla að beina viðskiptum sínum til fyrirtækja sem hér starfrækja þjónustu í sveitarfélaginu.“