Aurflóð lenti á húsum á Seyðisfirði
Aurflóð sem féll Þófalæk á Seyðisfirði í nótt lenti á tveimur húsum. Annað þeirra er talsvert skemmt. Lækurinn er þekktur skriðufarvegur.
„Þetta er mannskæðasti Íslandssögunnar. Það koma reglulega skriður þarna niður,“ segir Bjarki Borgþórsson, eftirlitsmaður hjá Veðurstofu Íslands á Seyðisfirði.
„Vegleg spýja“ kom niður farveginn á milli klukkan 11 í gærkvöldi og 3 í nótt, skammt utan við gistiheimilið Norðursíld. Spýjan tók veginn út með firðinum í sundur en honum hafði þá þegar verið lokað vegna skriðuhættu.
Skriðan átti upptök sín ofarlega í fjallinu, upp undir Strandartindi og flutti með sér stór björg. Hún lenti á tveimur húsum, öðru mannlausu íbúðarhúsi, hinu skemmu sem virðist hafa skemmst talsvert.
Árið 1950 fórst móðir og fjögur börn hennar þegar skriða úr farveginum lenti á húsi þeirra stóð ofan við veginn.
Fleiri minni skriður féllu út með firðingum að sunnanverðu í vatnsveðrinu í gær. Seint í gærkvöldi dró úr rigningunni og síðan hefur sjatnað í ám og lækjum á Seyðisfirði. Bæjarstarfsmenn voru í morgun að laga veginn þar sem skriðan féll.
Bjarki telur mestu skriðuhættuna að baki en áfram verði fylgst með. „Við höfum augun á fjallinu. Það gætu komið spýjur.“
Mynd frá í gærkvöldi: Birkir Friðriksson
Myndir frá í morgun: Bjarki Borgþórsson. Fleiri myndir og nánari lýsingu má lesa hjá Veðurstofu Íslands
