Átta milljónir til húsnæðisframkvæmda hjá Minjasafni Austurlands
Endurnýjun húsnæðis Minjasafns Austurlands var eitt 13 verkefna sem fengu öndvegisstyrk þegar úthlutað var úr Safnasjóði í síðustu viku. Alls fá austfirsk verkefni rúmar 16 milljónir úr sjóðnum.Minjasafnið fær alls átta milljónir á næstu þremur árum, þrjár milljónir í ár og 2023 en tvær á því næsta til að standa straum af kostnaði sem fellur á safnið sjálft vegna framkvæmda við Safnahúsið á Egilstöðum.
Í frétt á vef safnsins kemur fram að það þurfi að flytja nær allan safnkostinn úr húsinu á meðan framkvæmdunum stendur. Þá nýtist styrkurinn einnig til að byggja upp aðstöðu safnsins í nýrri viðbyggingu og efna þannig faglegt starf þess á sviði varðveislu, rannsókna og miðlunar.
Minjasafnið á Bustarfelli í Vopnafirði er einnig meðal þeirra sem hljóta öndvegisstyrki en það hlýtur 1,7 milljónir samanlagt á þessu ári og næsta til skrásetningu sögu jarðar og ættar.
Bæði söfnin fá einnig verkefnastyrkir úr sjóðnum fyrir þetta ár. Minjasafnið fær 300.000 krónur til varðveislu á sumarhúsi Jóhannesar Kjarvals og 320.000 fyrir sýningu Francois Lelong, Hreindýradraugur III. Bustarfell fær hálfa milljón í Bustarfellsdaginn.
Tækniminjasafn Austurlands á Seyðisfirði fær alls þrjár milljónir króna, annars vegar 1,7 milljónir í fyrsta áfanga geymslu og tilfærslu eftir skriðuföllin í desember, hins vegar, 1,3 milljónir í annan hluta endurskoðun og stefnumótun safnsins.
Þá fær Sjóminjasafn Austurlands á Eskifirði 2,5 milljónir til að mynda og skrá safnmuni.
Menntamálaráðherra úthlutar styrkjum að fenginni umsögn safnaráðs. Alls var tilkynnt um ráðstöfun 236,4 milljóna króna að þessu sinni.
