Appelsínugul viðvörun fram á kvöld
Appelsínugul viðvörun verður í gildi fram til klukkan átta í kvöld á Austfjörðum. Þetta kemur fram á vefsíðu Veðurstofunnar. Hættustig er á Seyðisfirði vegna skriðufalla.Spáð er áframhaldandi mikilli rigningu sem mun valda auknum grunnvatnsþrýstingi og viðhalda hárri grunnvatnsstöðu. Áfram er því hætta á vatnsflóðum og skriðuföllum. Mikið álag á fráveitukerfi og miklar líkur á vatnstjóni.
Eins og fram hefur komið í morgun féllu tvær aurskriður á Seyðisfirði í nótt og hreif önnur þeirra húsið Breiðablik með sér og færði 50 metra. Húsið er talið ónýtt.
Skriður hafa einnig fallið á Eskifirði og Fáskrúðsfirði en án tjóns.
Fólk er varað við því að vera á ferli á Seyðisfirði og ökumenn eru sérstaklega beðnir um að fara varlega vegna skriðuhættu.
