Aðeins tveir eftir smitaðir
Aðeins tveir einstaklingar eru eftir með virkt Covid-19 smit á Austurlandi og jafnmargir í sóttkví.Þetta kemur fram í tölum á Covid.is. Staðan eystra hefur því batnað verulega í vikunni.
Í byrjun hennar voru sex í einangrun vegna smits og 23 í sóttkví. Á föstudag voru enn 18 í sóttkví. Í báðum hópum fækkaði verulega í gær og aftur í dag. Sléttar tvær vikur eru síðan síðast greindist nýtt smit á Austurlandi.
En þótt staðan hafi batnað standa enn áminningar um að halda samskiptafjarlægð, huga vel að smitvörnum og halda sig heima og hafa samband við heilsugæslu finni fólk fyrir einkennum.
