Samstarf um bættan námsárangur: Það var mikill samhugur og jákvæðni á fundinum
Föstudaginn 16. janúar síðastliðin skrifuðu skólastjórnendur leik- og grunnskóla á Austurlandi undir viljayfirlýsingu um bættan námsárangur, með sérstakri áherslu á læsi og stærðfræði. Skólastjórnendur eru með þessu að fylgja eftir ákvörðunum sveitarstjórna á Austurlandi sem ákváðu í sumar að setja aukið fjármagn til kennsluráðgjafar við Skólaskrifstofu Austurlands í þessum sama tilgangi. Mikill samhugur var á fundinum um samstarf milli skóla og skólastiga.
Næstu skref samkvæmt yfirlýsingunni eru að hver skóli setur sér markmið og velur sér leiðir í samráði við starfsfólk, foreldra og nemendur.
Með þessu vilja skólastjórnendur vinna saman að því að þróa skólastarf á Austurlandi enn frekar og tryggja að nemendur á Austurlandi standi öðrum nemendum ekki að baki í námi.
„Það var sérstaklega mikill samhugur á fundinum og jákvæðni. Það eru allir sem vilja vinna vel saman að þessum málum,“ segir Sigurbjörn Marinósson, forstöðumaður Skólaskrifstofu Austurlands.
Mynd: Við undirritun samningsins á föstudaginn.
