180 manns bólusettir í dag
180 Austfirðingar verða í dag bólusettir gegn Covid-19 veirunni með bóluefni frá Pfizer/BioNTech.Einstaklingar með undirliggjandi sjúkdóma á aldrinum 65-70 ára verða bólusettir á Fljótsdalshéraði. Þá verður jafnframt byrjað að bólusetja 18-64 ára með undirliggjandi sjúkdóma. Ekki verða frekari bólusetningar í fjórðungnum þessa vikuna.
Fleiri verða bólusettir í næstu viku. Þegar er ljóst að 240 skammtar berast sem duga til að klára 65-70 ára með undirliggjandi sjúkdóma á Austurlandi og halda áfram með yngri aldurshópinn auk þess sem byrjað verður að bólusetja fólk á aldrinum 60-70 ára með AstraZeneca.
Nína Hrönn Gunnarsdóttir, framkvæmdastjóri hjúkrunar hjá Heilbrigðisstofnun Austurlands, segir bólusetningarnar á svæðinu almennt ganga vel og þeir sem mæta í þær leggi sitt af mörkum til að láta allt ganga smurt á bólusetningarstað.
Fyrirkomulagi boðunar í bólusetningu hefur verið breytt. Ekki er lengur hringt í alla heldur send SMS-skilaboð og þeir sem ekki ætla að þiggja bólusetningu beðnir um að láta vita á netfangið This email address is being protected from spambots. You need JavaScript enabled to view it.. Þangað má einnig senda fyrirspurnir um bólusetningar. Að auki er hringt í þá sem ekki eru með skráð farsímanúmer í kerfi HSA.