Vélsmiðjan á Nesi verður menningardeigla

Fyrirhugað er að rífa gömlu vélsmiðjuna á Eyrinni í Neskaupstað en það hús er eitt af fáum húsum sem enn standa á svæðinu en Eyrin er elsta byggingarsvæði í Norðfirði.

Hákon Guðröðarson sem rekur kaffi og veitingahúsið Frú Lú Lú  hefur sett af stað menningarverkefni sem hann kýs að kalla Listasumar Frúarinnar og  í kjölfar þess tekið gömlu vélsmiðjuna upp á sína arma en þó Hákon sé ungur að árum finnst honum eins og svo mörgum Norðfirðingum að of hart sé gengið að því að rífa húsin á Eyrinni og ekkert komi í staðinn nema grasið grænt.

Strax og leyfi bæjaryfirvalda til að nýta húsið fyrir lista- og menningarviðburði var komið var hafist handa við að taka til og mála enda mikill áhugi á því að sjá aftur iðandi mannlíf á Eyrinni.

Styrkir og góðar gjafir hafa borist frá fyrirtækjum í bænum og til liðs við verkefnið hafa gengið fjölmargir listamenn sem stóðu m.a. fyrir dagsskrá í húsinu á Eistnaflugi um liðna helgi og síðan  verðuráframhaldandi opin Listasmiðja í sumar.

Á www.facebook.com geta þeir sem eru vinir Frú Lú Lú séð upplýsingar um framvindu mála á Eyrinni.

 

 

 

Texti og myndir: Áslaug Lárusdóttir, fréttaritari Austurgluggans í Neskaupstað.