Vilja byggja heilsulind í landi Unaóss
Sænskir fjárfestar hafa sýnt áhuga á uppbyggingu heilsulindar í landi Unaóss, yst í Hjaltastaðarþinghá á Fljótsdalshéraði. Eftir því sem næst verður komist byggir hugmyndin á fögru umhverfi á svæðinu og góðu aðgengi að sjó, en hlýjar sjólaugar, heilsumeðferðir og vel búin gistiaðstaða eru á teikniborðinu. Þorsteinn Bergsson, bóndi á Unaósi, sagði aðeins um hugmynd að ræða enn sem komið er, en staðfesti að Svíarnir hefðu rætt við hann um möguleika á uppbyggingu heilsulindarinnar.
Sagðist hann ekki ginnkeyptur fyrir miklu raski eða umferð um land sitt, en þó væri vert að skoða hugmyndina nánar ef sænsku fjárfestunum væri einhver alvara. Hann vildi ekki að svo stöddu gefa neitt upp um hvaða aðila er um að ræða, en sagði þá tengda sambærilegum heilsulindarekstri í suðurhluta Svíþjóðar. Þorsteinn telur að mál muni eitthvað skýrast með vorinu og ef af verður gætu framkvæmdir hafist innan þriggja ára.
Mynd: Þorsteinn Bergsson/SÁ
