Tapaði fimmtíu milljónum króna
Fljótsdalshreppur tapaði um fimmtíu milljónum króna við hrun bankakerfisins í haust. Fjármunirnir voru í Peningamarkaðssjóði í eignastýringu hjá Landsbankanum. Ekki er enn ljóst hvernig öðrum fjármunum sem voru í eignastýringunni reiðir af, því hluti skuldabréfasjóða hefur ekki enn verið opnaður fyrir markaði. Um 2/3 fjármuna félagsins voru ávaxtaðir á innlánsreikningum í bankanum og urðu ekki fyrir skakkaföllum við hrunið.
Frá þessu greinir í apríl-fréttabréfi Fljótsdalshrepps. Þar kemur jafnframt fram að gert er ráð fyrir ríflega 27 milljóna króna tapi af rekstri hreppsins á árinu. Sveitarstjórn samþykkti fjárhagsáætlun ársins í lok janúar. Í áætluninni er gert ráð fyrir 75 milljónum króna til framkvæmda á árinu. Fyrirferðarmest eru framhald ljósleiðaralagna í sveitinni og uppbygging í Laugarfelli.
Við gerð fjárhagsáætlunar samþykkti sveitarstjórn að lækka útsvar úr 13,03% í 12%. Einnig var samþykkt að halda gjaldskrám óbreyttum. Þrátt fyrir að sveitarfélagið vilji með þessum hætti koma til móts við íbúa og taka á sig tekjulækkun, er fjárhagur talinn verða vel viðunandi næsta ár.
Afborganir af lánum nema 13,5 milljónum króna vegna láns frá Landsvirkjun vegna endurbóta á Végarði og vegna félagslegra íbúða á Hallormsstað. Engin lántaka er fyrirhuguð í ár.
