Staða heilbrigðisþjónustu óásættanleg
Á fundi bæjarráðs Fjarðabyggðar 1. september sl. var eftirfarandi áskorun vegna heilbrigðisþjónustu í sveitarfélaginu samþykkt og henni beint til heilbrigðisráherra: ,,Staða heilbrigðisþjónustunnar í Fjarðabyggð er algjörlega óásættanleg. Nauðsynlegt er að grafast fyrir um ástæður þess að ekki hafa fengist læknar til starfa í Fjarðabyggð, sunnan Oddsskarðs, með fasta búsetu í sveitarfélaginu. Skortur á hjúkrunarfræðingum er líka viðvarandi vandamál.
Heilsugæsla er ein af grunnstoðum í þjónustu hvers sveitarfélags og er óviðunandi að henni sé sinnt af afleysingarfólki sem hefur stutta viðveru í hvert sinn. Slíkt fyrirkomulag getur aldrei orðið til þess að skapa það traust og trúnað sem þarf að vera milli heilbrigðisstarfsfólks og sjúklinga. Bæjarráð Fjarðabyggðar skorar á heilbrigðisráðherra að láta þegar í stað fara fram hlutlausa úttekt á starfsemi Heilbrigðisstofnunar Austurlands. Fenginn verði sjálfsstætt starfandi úttektaraðili til að ræða við starfsmenn og stjórnendur um starfsumhverfi sitt. Á grundvelli úttektarinnar verði gripið til þeirra aðgerða sem óhjákvæmilegar eru til að tryggja viðunandi þjónustu heilsugæslunnar í sveitarfélaginu"
