Rithöfundalest á Austurlandi
Hin árvissa rithöfundalest æðir um Vopnafjörð, Hérað og Seyðisfjörð um helgina en ferðin hefst á Vopnafirði í kvöld. Höfundarnir eru að þessu sinni fjórir.
Kristín Steinsdóttir les úr nýrri skáldsögu sem heitir Ljósa. Bragi Ólafsson les úr bók sinni Handritið að kvikmynd Arnar Featherby og Jóns Magnússonar um uppnámið á veitingahúsinu eftir Jenný Alexson. Sigrún Pálsdóttir kynnir Þóru biskups og raunir íslenskrar embættismannastéttar og Ævar Örn Jósepsson kynnir sinn nýjasta krimma, Önnur líf.
Lestin brunar í hlað á Miklagarði á Vopnafirði á föstudagskvöld kl. 20.30. Á laugardaginn verður lesið á Skriðuklaustri kl. 15 og á Seyðisfirði fer lesturinn fram í Skaftfelli kl. 15 á sunnudag. Aðgangseyrir er kr. 1000 og 500 kr. fyrir eldri borgara. Bækur höfunda verða til sölu á staðnum.
