Refsað fyrir rautt spjald: Þurfti að mæta í kjól á æfingu - Myndir
Björgvin Karl Gunnarsson, leikmaður 2. deildar liðs Hattar í knattspyrnu, klæddist kvenmannskjól á æfingu liðsins í kvöld fyrir að hafa verið rekinn út af í seinasta leik.
Leikmenn sem fá rauða spjaldið sæta oft ýmsum refsingum hjá liðum sínum. Í sumar sömdu leikmenn Hattar um það sín á milli að þeir sem reknir eru út af þurfa að mæta í kjól á seinustu æfingu fyrir næsta leik. Í kvöld var það Björgvin Karl Gunnarsson sem klæddist gráum kjól.
„Þetta var allt í lagi. Það er ekki spennandi að fara í kjólinn en það lyftir móralnum í liðinu. Hann er teygjanlegur og fínn. Strákarnir voru ósáttir við að ég væri ekki fáklæddur undir kjólnum, helst bara í stuttbuxum og ber að ofan en ég var ekki til í það kvefaður í átta stiga hita,“ sagði Björgvin Karl eftir æfinguna.
Sami kjóllinn er notaður fyrir alla þá sem fá brottvísanir í leikjum Hattar. „Ég vil fá erfiðari kjól, einhvern sem lætur mann hafa fyrir að vera í honum,“ segir Björgvin Karl, sem sjálfur var í sektarnefndinni sem ákvað viðeigandi refsingar fyrir ýmis agabrot liðsins.
Einn þeirra sem hafa þurft í kjólinn er þjálfarinn, Njáll Eiðsson. Aðspurður um hvernig hann hefði tekið sig út í dressinu svarði Björgvin Karl: „Ég held að hann hafi komið betur út en ég.“
Höttur tekur á móti Magna á Fellavelli klukkan 20:00 á morgun. Á sama tíma tekur Fjarðabyggð á móti Haukum á Eskifjarðarvelli.