MEingar í sjónvarpið og mótmæltu lokun RÚVAust
Menntaskólinn á Egilsstöðum tryggði sér í kvöld sæti í sjónvarpshluta spurningakeppni framhaldsskólanna, Gettu betur, þegar liðið skólans vann lið Fjölbrautarskóla Norðurlands vestra 27-11. ME-liðið notaði tækifærið til að mótmæla lokun starfsstöðvar Ríkisútvarpsins á Egilsstöðum.
ME-ingar voru yfir eftir hraðaspurningar 18-8 og voru aldrei í neinum vandræðum með mótherjana úr Skagafirði. Liðsmenn ME nýttu tækifærið til að mótmæla lokun starfsstöðvar Ríkisútvarpsins á Egilstöðum.
„Við viljum koma á framfæri mótmælum gegn fyrirhugaðri lokun starfsstöðvarinnar. Við erum líka landsmenn og viljum njóta þjónustu RÚV,“ sögðu liðsmenn ME.
Lokunin kann að gera það að verkum að þetta verði seinasta keppnin sem send verði út frá Egilsstöðum en til stendur að selja húsnæði stofnunarinnar á staðnum.
Liði ME skipa Álftfirðingurinn Arnar Jón Guðmundsson, Egilsstaðabúinn Hrólfur Eyjólfsson og Berufirðingurinn Jóhann Atli Hafliðason.
