Gyða Árnadóttir: Syng á hverjum einasta degi
Gyða Árnadóttir verður fulltrúi Austurlands í Söngvakeppni framhaldsskólanna á morgun en hún keppir fyrir hönd Menntaskólans á Egilsstöðum. Hún sigraði forkeppni skólans með tökulagi en hefur líka verið að gefa út eigin tónlist.„Ég syng á hverjum einasta degi og hef gert mjög lengi. Gríp þá gjarnan í gítarinn minn þó ég kunni nú ekki mikið á hann. Ég rétt kann nógu mikið til að geta spilað aðeins undir fyrir sjálfa mig.
Ég tek daglega í hann í herberginu mínu og syng þá helst mín eigin lög. Ég er líka töluvert að semja lög og texta og gæti tiltölulega auðveldlega sett inn lög á heila plötu ef ég kærði mig um,“ sagði Gyða í viðtali í Austurglugganum í síðustu viku.
Nokkur laga hennar hafa farið inn á Spotify sem Schdoobler. Hún segist annars mest lög eftir hljómsveitina They Might be Giants sem faðir hennar haldi upp á. Eins hafi hann smitað hana af áhuga á Ljótu hálfvitunum.
„Ég nánast ólst upp við tónlistina þeirra og um tíma þýddi orðið tónlist fyrir mig að heyra í því bandi. Sérstaklega lærði ég lagið Bjór, meiri bjór mjög snemma og söng það lengi fyrir mig og mína.“
Gyða hefur tvisvar tekið þátt í tónlistarkeppninni Upptaktinum þar sem lag eftir hana komst í úrslit í seinna skiptið. Hún reyndi fyrir sér í Músiktilraunum nýverið en komst ekki áfram. Á morgun tekur hún síðan þátt í Söngvakeppninni sem haldin verður í Kaplakrika.
Lengri útgáfa birtist í Austurglugganum sem kom út í vikunni. Hægt er að panta áskrift hér.
