Á annað þúsund manns mættu í kirkjurnar í Vopnafirði um hátíðarnar
Stefán Már Gunnlaugsson, sóknarprestur í Hofsprestakall, segist ánægður
með kirkjusókn í söfnuðinum um hátíðarnar. Messað var alla hátíðisdagana
í kirkjunum auk þess var helgistund í Sundabúð.
„Samtals sóttu 500 manns guðsþjónustur í kirkjunum um aðventuna, jól og áramót, en á Vopnafirði búa um 650 manns,“ segir Stefán. Ekki er talin með þátttaka í öðrum athöfnum en hann áætlar að á annað þúsund manns hafi sótt kirkjurnar á tímabilinu séu þær taldar með.
„Það er ánægjulegt að sjá hvað margir finna sig velkomna í kirkjuna. Á fyrsta sunnudegi í aðventu var guðsþjónusta í Vopnafjarðarkirkju og á öðrum sunnudegi í aðventu var aðventuhátíð, en hún var var vel sótt og bæta þurfti við stólum í kirkjuna, en hún tekur 170 manns í sæti.
Þátttaka barnanna var þar áberandi en barnakór söng, börn úr tónlistarskólanum voru með tónlistaratriði, fermingarbörn og börn úr 10-12 ára starfinu voru með helgileik. Kirkjukórinn söng, Kristján L. Möller, alþingismaður, flutti hugleiðingu og æskulýðsfélag kirkjunnar bauð kirkjugestum upp á aðventukaffi.
Um jólin var var aftansöngur á aðfangadag og var kirkjan þéttsetinn að venju. Á jóladag var mjög góð kirkjusókn í hátíðarguðsþjónustu í Hofskirkju. Á öðrum degi jóla var fjölsótt fjölskylduguðsþjónusta í Vopnafjarðarkirkju þar sem börn í 2.-5. bekk sýndu jólahelgileikinn og fermingarbörn fluttu bænir. Þá var helgistund á hjúkrunardeild Sundabúðar á þriðja degi jóla.
Um áramót var aftansöngur á gamlárskvöld í Vopnafjarðarkirkju og á nýársdag var hátíðarguðsþjónusta í Hofskirkju, þar sem Ólafur B. Valgeirsson, formaður sóknarnefndar Vopnafjarðarkirkju, prédikaði.
Þá var þátttaka barna og unga fólksins góð eins og raunar alla samkomudaga í kirkjunni árið um kring. Hefðin á Vopnafirði er sterk fyrir traustu kirkjustarfi og helgihaldi, sem birtist í hlýhug í garð kirkjunnar og margir vilja leggja starfinu lið.“
