800 tonn af færiböndum urðuð
Umhverfisstofnun hefur gefið leyfi til að um 800 tonn af færiböndum úr aðrennslisgöngum Kárahnjúkavirkjunar verði urðuð. Impregilo notaði tugkílómetra löng færiböndin til að flytja grjót frá Robbins borunum sem notaðir voru til að heilbora megnið af gangakerfi virkjunarinnar. Á að urða færiböndin, sem tekur minnst fjörtíu stóra bíla til að flytja, á urðunarstað Fljótsdalshéraðs að Tjarnarlandi.
Impregilo féll frá því að endurvinna færiböndin eftir athugun, þar sem torvelt mun að vinna úr því gúmmíi og stáli sem þau eru gerð úr. Var þá leitað til Gámaþjónustunnar og fundið út að ódýrast væri að urða færiböndin í Tjarnarlandi. Tjarnarland var hins vegar ekki opið til urðunar í vikunni, þar sem samningar þar um við sveitarfélagið voru runnir út.
