Vopnafjarðarhreppur: Reikna með yfir ríflega 90 milljóna hagnaði
Gert er ráð fyrir tæplega 93 milljóna hagnaði af rekstri Vopnafjarðarhrepps á árinu. Fráveituframkvæmdir verða fyrirferðamestar á árinu.
Sveitarfélagið hefur síðustu ár verið í hópi best stæðu sveitarfélaga landsins og í þriggja ára áætlun er gert ráð fyrir áframhaldandi niðurgreiðslu skulda og hækkun á haldbæru fé. Þannig er gert ráð fyrir að skuldir verði tæpar 324 milljónir í lok nýhafins árs og verði komnar niður í 233 milljónir árið 2019. Á sama tíma er reiknað með að handbært fé aukist úr 60 milljónum í 113.
Tæpar 125 milljónir eru ætlaðar til framkvæmda í ár. Mestur kostnaður er við fráveituframkvæmdir, 30 milljónir. Af öðrum helstu verkefnum má nefna meiriháttar viðhald á fasteignum og gatakerfi, skólabyggingum, sundlauginni í Selárdal auk þess sem dýpa þarf höfnina.
Tekjur sveitarfélagsins eru áætlaðar tæpar 934 milljónir, þar af 622 milljónir í A-hluta. Ekki er gert ráð fyrir lántökum heldur verður gengið á eigið fé til að mæta framkvæmdum umfram rekstrarniðurstöðu.
