Vilja áætlun um húsnæði Djúpavogsskóla
Starfshópur um húsnæðismál Djúpavogsskóla leggur til að fyrir árslok verði tilbúin áætlun um framtíðarlausnir á húsnæði skólans sem er of lítið.
Hópurinn skilaði tillögum sínum á fundi hreppsnefndar í síðustu viku. Þær skiptast upp í fjóra hluta.
Í fyrsta lagi að fallið verði frá því að flytja fimm ára börn af leikskólanum í grunnskólann í haust. Í öðru lagi að ekki verði fleiri en 37 börn í leikskólanum og allt kapp lagt á að fá dagforeldra fyrir þau börn sem ekki fá leikskólapláss.
Í þriðja lagi á að gera heildstæða áætlun sem byggir á þarfagreiningu hópsins um framtíðarlausn. Hún gerir ráð fyrir að öll starfsemi skólans fari í eigið húsnæði og leikskólinn verði þrjár deildir.
Þessi áætlun á að vera klár fyrir lok árs. Í fjórða lagi á að senda þarfagreininguna til fagaðila.
Djúpavogsskóli samanstendur af tón-, leik- og grunnskóla. Þeir voru sameinaðir í eina stofnun árið 2011 en eru reknir í fjórum byggingum.
Leikskólinn telst fullsetinn þegar tuttugu börn á eru á eldri deild og fimmtán á yngri deild. Í dag eru tuttugu og fimm börn á eldri deildinni og ekki útlit fyrir fækkun næstu fjögur árin.
Yngri deildin er fullsetin og heldur útlit fyrir að þar fjölgi næstu tvo vetur en fimmtán börn fæddust í sveitarfélaginu á síðasta ári.
Tónskólinn hefur verið í leiguhúsnæði og öllum hans eigum verið pakkað saman á vorin. Þótt grunnskólinn teljist kannski ekki sprunginn sé mjög þröngt um starfsemina þar.
