Vel yfir 200 undirskriftir komnar á Seyðisfirði
Vel yfir 200 íbúar á Seyðisfirði hafa ritað undir áskorun um að hætt verði við áform um laxeldi í firðinum. Skoðanakönnun á netinu sýnir einnig að stór hluti íbúa Seyðisfjarðar er andvígur laxeldinu.Þóra Bergný Guðmundsdóttir íbúi á Seyðiafirði hefur verið í forsvari fyrir þá sem safna undirskriftunum. Hún segir að þátttakan hafi verið mun meiri en fólk átti von á.
„Söfnunin er enn í fullum gangi hjá okkur þannig að fleiri nöfn eiga vonandi eftir að bætast við.“ segir Þóra. „En það er mikil stemming í bænum gegn þessum áformum um laxeldi í Seyðisfirði.“
Undirskriftarlistar hafa legið frammi í bænum undanfarna daga á Skaftfelli og í kaupfélaginu. Þar að auki hefur fólk gengið í hús með undirskriftalista.
„Ég hringdi í einn íbúa í hverri götu og margir þeirra fengu lista til að ganga með í götunni sinni,“ segir Þóra Bergný.
Þá má nefna að skoðanakönnun hefur verið í gangi á lokaðri spjallsíðu fyrir Seyðisfirðinga á Facebook. Um helgina voru yfir 100 búnir að tjá skoðun sína á laxeldinu. Fjórir svarmöguleikar eru í boði eftir hve fólk er hart með eða á móti eða þar á milli. Yfir helmingur svarenda er alfarið á móti laxeldinu en ekki nema tugur sem er alfarið með eldinu.
Aðspurð um hvað gert verður við listann og hver fær hann afhentan segir Þóra Bergný að það verði rætt í vikunni. Fyrst verði undirskriftaherferðin kláruð og síðan fundað um hverjum og hvernig listinn verður afhentur. „Kannski fer afhendingin fram rafrænt vegna COVID,“ segir Þóra Bergný.