Vel lukkuð verslunarmannahelgi
Verslunarmannahelgin var með friðsamara móti í umdæmi lögreglunnar á Austurlandi. Nokkuð var þó um að ökumenn væru teknir fyrir of hraðan akstur.„Þetta er ein albesta verslunarmannahelgi sem ég hef upplifað,“ sagði Jónas Wilhelmsson, yfirlögregluþjónn, í samtali við Austurfrétt.
Stærsta hátíðin í umdæminu var Neistaflug í Neskaupstað. Jónas sagði hana almennt hafa farið vel fram, nokkur ölvun hefði verið og erill í tengslum við skemmtanahald en engin teljandi vandamál.
Lögreglan hélt uppi öflugu umferðareftirliti um helgina, líkt og áður í sumar. Yfir 70 kærur voru gefnar út eftir helgina vegna umferðarlagabrota, flestar fyrir hraðaakstur.
Sá sem hraðast ók var á 124 km/klst en algegnt var að ökumenn væru á um 110 km hraða. Jónas segir þetta sýna þörfina á öflugu umferðareftirliti sem haldið verði áfram.