Vegurinn upp á Fljótsdalsheiði illa farinn eftir krapaflóð
Vegurinn upp á Fljótsdalsheiði er illa farinn efst í Bessastaðafjalli eftir vatnavexti á sunnudag.
Krapastífla virðist hafa komið í Sauðabanalæk sem síðan fór af stað með miklum látum og runnið með fram veginum niður í efstu beygjuna.
Afleiðining er sú að stórt skarð er í hægri akrein á löngum kafla. Grjót og drulla liggur í efstu beygjunni þar sem malbikið er í rúst. Mikið hefur runnið úr veginum í henni neðanverðri eins og sjá má á meðfylgjandi myndum.
Skemmdir urðu einnig þar í leysingunum milli jóla og nýárs.
Vegurinn upp á Fljótsdalsheiði, þar sem meðal annars er farið inn í Kárahnjúka og að Snæfelli. Inn heiðina er einig ekið að hálendishótelinu Laugarfelli sem á að opna á morgun. Vegurinn inn heiðina hefur verið merktur lokaður síðan á sunnudag.