Unga fólkið vill meiri kynfræðslu í skólum Múlaþings
Meiri kynfræðsla, aukin áhersla á fjármálalæsi og meira val um námsleiðir í skólunum var meðal þess sem ályktað var um á sérstöku Ungmennaþingi sem fram fór í Valaskjálf á Egilsstöðum nýverið.
Það var ungmennaráð Múlaþings sem blés til þingsins en yfirskriftin var „Hvað þýðir sameining fyrir okkur“ og lögð áhersla á það hvernig sameining fjögurra sveitarfélaga í eitt hefur haft áhrif á unga fólkið á svæðunum sem um ræðir.
Fjölmargar forvitnilegar ábendingar bárust frá gestum á þinginu um hvað mætti betur fara og gera til framtíðar fyrir yngra fólkið. Auknir valmöguleikar í skólum var áberandi ósk og þá ekki síst varðandi tungumálanám og margir vildu sjá meira af námsefni sem beinlínis gerir fólk tilbúnara út í lífið að námi loknu. Þar sérstaklega nefnt að fjármálalæsi þyrfti að efla sem og skilning á skattamálum og tölvutækni. Ýmsir vildu ennfremur sjá aukna kynfræðslu verða hluta af námi.
Gestum fannst engin ástæða til að skoða sérstaklega sameiningar grunnskóla í Múlaþingi en hins vegar kom til tals að nýta kennara meira á milli skólanna. Þar á meðal ábending um að samnýta frekar kennslu unglinga í Fella- og Egilsstaðaskóla.
Unga fólkið var líka á þeirri skoðun að bæta þyrfti samgöngur á milli byggðakjarna sveitarfélagsins ekki hvað síst varðandi aðgengi að íþróttaæfingum og félagsmiðstöðvum. Bæta þarf framboð íþrótta- og tómstundastarfs í smæstu byggðakjörnunum og ákall var um bætta aðstöðu til íþrótta og ekki þar síst til knattspyrnuæfinga.
Fjölmargt annað bar á góma gesta á þinginu en allar ábendingar sem fram komu fara til frekari skoðunar hjá viðeigandi stofnunum, ráðum eða nefndum Múlaþings.
Bæta þarf aðstöðu til íþróttaiðkunar í Múlaþingi að mati gesta á Ungmennaþinginu nýverið. Mynd Múlaþing