Þvottaveldið opnar á Breiðdalsvík
„Mér fannst ég hafa svo mikinn frítíma að mig langaði að gera eitthvað skemmtilegt,“ segir Sigríður Stephensen Pálsdóttir, stofnandi Þvottaveldisins, sem er eitt þeirra fjórtán verkefna á Breiðdalsvík sem hljóta brautargengi til samfélagsverkefna á vegum verkefnisins Brotthættra byggða í ár.
Markmiðið með verkefninu Brothættum byggðum er meðal annars að fá fram skoðanir íbúanna sjálfra á framtíðarmöguleikum heimabyggðarinnar og leita lausna á þeirra forsendum í samvinnu við ríkisvaldið, landshlutasamtök, atvinnuþróunarfélag, sveitarfélagið, brottflutta íbúa og aðra.
Áætlaður heildarkostnaður þeirra verkefna sem hlutu styrk á Breiðdalsvík í ár er um 40 milljónir króna, sótt var um styrki fyrir 11,7 en alls fengust 5,3 milljónir. Jöfn kynjahlutföll voru á milli styrkþega þar sem sjö konur og sjö karlar hlutu styrki.
Eftirtalin verkefn hlutu styrki:
Sigríður Stephensen Pálsdóttir Þvottaveldið 900.000
Karítas Ósk Valgeirsdóttir Hárstyrtistofa 700.000
Útgerðarfélagið Einbúi ehf Vöruþróun 700.000
Breiðdalsbiti ehf Markaðssetning og þróun vara Breiðdalsbita 600.000
Hið Austfirzka Bruggfjélag ehf Beljandi Brugghús starfsleyfisumsóknir 450.000
Bifreiðaverkstæði Sigursveins ehf Vakinn gæðavottun í ferðaþjónustu 400.000
Breiðdalshreppur Viðburðastjórn menningardags Breiðdælinga 2017 300.000
Halldór Jónsson Breiðdalsgáttin 250.000
Kvennfélagið Hlíf Rock the Boat 200.000
Þorgils H. Gíslason/Hrafnkell Freysgoði Frisbígolf - völlur 200.000
Arnaldur Sigurðsson Ullargull 200.000
Breiðdalssetur Ný heimasíða fyrir Breiðdalssetur 150.000
Breiðdalssetur Walker mapping award 150.000
Arnar Sigurvinsson Landbúnaðartengt Hostel í Breiðdal 100.00
Eitt og hálft til tvö heilsársstörf
Sigríður segir að hugmyndin hafi komið til sín eftir að hún flutti til Breiðdalsvíkur frá Reykjavík fyrir tveimur árum. „Ég er menntaður félagsráðgjafi og hef starfað við það og alltaf unnið mjög mikið. Þegar ég flutti hingað fór ég að kenna við grunnskólann og var einnig náms- og starfsráðgjafi í hlutastarfi í Fjarðabyggð um tíma. Þrátt fyrir það fannst mér ég eiga svo mikinn aukatíma að mig langaði að gera eitthvað sem skapaði störf á staðnum.
Sigríður segir að hún og maðurinn hennar, Árni Björn Guðmundsson, hafi velt því fram og til baka í hvaða rekstur væri sniðugast að fara, hvað vantaði og væri raunhæft að reka á staðnum.
„Við gerðum óformlega könnun í kringum okkur og sáum að það er rekstrargrundvöllur fyrir þessu og við stefnum á að skapa eitt og hálft til tvö heilsársstörf til að byrja með. Við stefnum á að opna 1. júní, við erum að standsetja húsnæðið og kaupa inn tæki og þýskt gæðalín, bæði rúmföt og handklæði. Við munum semsagt bjóða upp á leigu á líni ásamt að skutla því og sækja til viðkomandi. Það er engin sambærileg þjónusta í nágrenninu, en þessir rekstraraðilar hafa þurft að sækja lín um langan veg. Auðvitað munum við einnig bjóða upp á þrif á öðru líni ef eftir því er óskað.“