Tveir leikskólar í Fjarðabyggð stytta opnunartíma vegna COVID
Í dag þriðjudag verður styttri opnunartími í tveimur leikskólum í Fjarðabyggð vegna hertra sóttvarnarreglna. Um er að ræða Dalborg á Eskifirði og Lyngholt á ReyðarfirðiDalborg verður opin til kl. 12:15 í dag og í Lyngholti verður opið frá kl. 12:00 til 16:30. Aðrir leikskólar í Fjarðabyggð munu hafa óbreyttan opnunartíma.
Á vefsíðu Fjarðabyggðar segir að ástæða þessa er reglugerð heilbrigðisráðherra um hertar sóttvarnir í skólastarfi sem birt var kl. 21:30 í gærkvöldi. Í henni kemur m.a. fram að fjöldatakmarkanir verða í leikskólum, 50 börn saman í hólfi, auk þess sem samgangur starfsmanna er takmarkaður. Í þessum tveimur leikskólum þarf að fara í talsverðar tilfæringar og endurskipuleggja starfið með hliðsjón af hertum reglum.
„Beðist er velvirðingar á þeim óþægindum sem þetta kann að valda, en þessar ráðstafanir eru nauðsynlegar til að tryggja að reglugerðinni sé fylgt. Við vonum að foreldrar sýni þessu skilning,“ segir á vefsíðunni.
