Tveir í einangrun eftir landamæraskimun
Tveir einstaklingar, búsettir á Austurlandi, eru komnir í einangrun eftir að hafa greinst með Covid-19 smit við komuna til landsins.Samkvæmt tölum frá Covid.is eru nú tveir einstaklingar í einangrun. Kristján Ólafur Guðnason, yfirlögregluþjónn, segir fólkið hafa sama dvalarstað og sé nú þar í einangrun.
Fólkið fór í skimun við komuna til landsins en fékk að henni lokinni að halda rakleitt til síns heima og vera í sóttkví uns niðurstöður bárust.
Ekki á að vera nein hætta á að tvímenningarnir hafi smitað aðra á svæðinu. Einn einstaklingur er nú í sóttkví á Austurlandi.
Aðgerðastjórn áminnir Austfirðinga um að fara áfram með gát þótt í dag hafi verið gefið út að reglur verði rýmkaðar á ýmsum sviðum næsta miðvikudag. „Sem stendur siglum við á lygnum sjó. Áframhaldandi persónuleg aðgát og samheldni okkar vegur þungt í að svo megi verða áfram og alla leið í land.“
