Tveir í einangrun eftir landamæraskimun
Tveir einstaklingar eru í einangrun á Austurlandi vegna Covid-19 smits. Veiran greindist hjá báðum þeirra við landamæraskimun. Þriðji einstaklingurinn er skráður er með veiruna eystra dvelur ekki á svæðinu.Samkvæmt tölum Covid.is eru þrjú virk smit á Austurlandi og þrír í sóttkví.
Kristján Ólafur Guðnason, yfirlögregluþjónn hjá lögreglunni á Austurlandi, segir að tveir þeirra hafi greinst smitaðir við sýnatöku í Flugstöð Leifs Eiríkssonar við komuna til landsins.
Þeir hafi ekið saman austur í einkabíl og hafi síðan verið í einangrun á heimili sínu. Fylgst er með líðan þeirra og þörfum bæði af Heilbrigðisstofnun Austurlands og Covid-19 göngudeild Landsspítalans.
Enginn er í sóttkví vegna þessara smita og engin grunur um nein smit út frá þeim. Fólkið verður í einangrun meðan veikindi þess vara, en gera má ráð fyrir að það verði í hálfan mánuð.
Þriðji einstaklingurinn sem skráður er með smit er með lögheimili í fjórðungnum en er í einangrun í öðrum landshluta. Fjöldinn á Covid.is verður leiðréttur til samræmis við þetta í næstu uppfærslu.
