Tilkynningar framvegis á þriðjudögum og föstudögum
Aðgerðastjórn almannavarnanefndar á Austurlandi hefur ákveðið að senda framvegis frá sér tilkynningar tvisvar í viku um stöðu Covid-19 faraldursins á svæðinu.Tilkynningarnar hafa verið daglegar síðustu vikur þótt segja megi að vart hafi greinst smit á svæðinu síðan um miðjan ágúst. Landshlutinn er sá eini sem í dag státar af því að hafa ekkert smit né nokkurn í sóttkví og þannig hefur staðan verið undanfarna viku.
Aðgerðastjórnin hyggst framvegis senda frá sér tilkynningar á þriðjudögum og föstudögum, nema eitthvað sérstakt komi upp.
Á miðvikudag taka gildi minniháttar tilslakanir á sóttvarnareglum. Þær eru þær helstar að íþrótta-, æskulýðs og tómstundastarf barna í leik- og grunnskólum verður heimilt á ný sem og starfsemi sem krefst nándar en hægt er að vinna með grímum svo sem hárgreiðsla, ökukennsla og nudd.
Aðgerðastjórnin minnir Austfirðinga á að fylgja áfram settum reglum og sýna aðgát og þolinmæði líkt og gert hafi verið til þessa. „Við höfum til þessa í sameiningu gengið, þrammað, öslað, arkað, róið og siglt – höldum því endilega áfram.“
