Þyrla LHG bíður átekta á Höfn
Þyrla Landhelgisgæslunnar (LHG) bíður nú átekta á Höfn í Hornafirði. Vont veður er á leitarsvæðinu þar sem tugir björgunarsveitamanna leita að týndum manni í Stafafellsfjöllum í Lóni.
Davíð Már Bjarnason upplýsingafulltrúi Landsbjargar segir að tugir björgunarsveitamanna hafi verið við leit í nótt ásamt sporhundi. Hundurinn kom með þyrlu LHG í gærkvöld.
Davíð segir að von sé á fleiri leitarhundum á svæðið í dag. Einnig hafi drónar verið notaðir en veðrið á svæðinu í augnablikinu gerir það að verkum að takmörkuð not eru af þeim.
Þeir björgunarsveitarmenn sem leituðu í nótt eru nú í hvíld en um eitt hundrað aðrir björgunarsveitarmenn eru komnir á leitarsvæðið eða eru á leið þangað.
Eins og kom fram í morgun hafa allar björgunarsveitir á Austurlandi og Suðurlandi verið kallaðar út í leitina sem hófst um áttaleytið í gærkvöldi.
