Þota frá Lufthansa prófar brautina á Egilsstöðum
Þota merkt þýska flugfélaginu Lufthansa hefur vakið þeirra sem leið hafa átt um flugvöllinn á Egilsstöðum í dag.
Eftir því sem Austurfrétt kemst næst er um nýja vél í flota þýska félagsins að ræða og er verið að reyna hana á flugvöllum á nokkrum stöðum um heiminn, þar á meðal á Egilsstöðum. Hún er af gerðinni Airbus A320. Þær hafa löngum verið vinsæla en Lufthansa fékk fyrstu vélina sem afhent er úr nýrri línu hennar, A320neo í janúar síðastliðnum. Sjö vélar af þessari gerð voru komnar í rekstur um síðustu mánaðarmót.
Vélin sem kom í Egilsstaði var afhent þýska flugfélaginu í mars og er því ekki nema þriggja mánaða gömul.
Lufthansa með dótturfélögum er stærsta flugfélag Evrópu, bæði hvað varðar stærð flugflota og farþegafjölda. Það flýgur til 18 áfangastaða í Þýskalandi og 197 staða í 78 löndum um allan heim.
Ríflega 260 vélar eru í flota félagsins. Höfuðstöðvar þess eru í Köln, aðalflughöfnin í Frankfurt en starfsmennirnir flestir í München.
Lufthansa flýgur til Keflavíkur frá Düsseldorf, Hamburg, Berlín, Frankfurt og München. Í samtali við Túristi.is nýverið sagði framkvæmdastjóri félagins að Íslandsflugið væri ein ábatasamasta flugleið þess.
