Þjóðfylkingin ekki með lista í Norðaustur
Kjósendur í Norðausturkjördæmi geta valið milli tíu framboða í komandi þingkosningum. Íslenska þjóðfylkingin er ekki þar á meðal.
Forsvarsmenn fylkingarinnar höfðu tilkynnt að hún myndi bjóða fram í öllum kjördæmum og síðast í gær ritaði einn þeirra á Facebook-síðu hennar að í dag myndi koma „fullskipaðir listar í öllum kjördæmum.“
Gestur Jónsson, formaður yfirkjörstjórnar í Norðausturkjördæmi, staðfesti í samtali við Austurfrétt að tíu framboð hefðu skilað inn listum og meðmælendum fyrir tilsettan tíma á hádegi. Þjóðfylkingin er ekki þar á meðal.
Gestur sagðist ekki eiga von á fleiri framboðum eða breytingu. „Það hefur enginn haft samband.“
Þjóðfylkingin hefur sent fulltrúa á nokkra framboðsfundi að undanförnu, þar á meðal á Egilsstöðum á miðvikudagskvöld. Sá fulltrúi var reyndar á lista í Reykjavík suður en bar fundinum kveðju frá Snorra Óskarssyni, oft kenndum við Betel, sem verma átti efsta sætið.
Framboðin tíu í Norðausturkjördæmi eru því:
Alþýðufylkingin
Björt framtíð
Dögun
Flokkur fólksins
Framsókn
Píratar
Samfylkingin
Sjálfstæðisflokkurinn
Viðreisn
Vinstrihreyfingin - grænt framboð