„Þetta er ómetanleg viðurkenning og klapp á bakið“
Guðni Th. Jóhannesson, forseti Íslandi veitti í gær LungA, Listahátíð ungs fólks á Austurlandi, heiðursviðurkenningu við hátíðlega athöfn á afmælishátíð Erasmus+ sem fram fór í Hörpu. Björt Sigfinnsdóttir framkvæmdastjóri og Aðalheiður Borgþórsdóttir, einn af stofnendum LungA tóku við viðurkenningunni. „Þetta er ómetanleg viðurkenning og klapp á bakið, en við vonum að samstarfið við Erasmus+ haldi áfram að blómstra næstu árin,“ segir Björt.Heiðursviðurkenningin er veitt í ár í tilefni af 30 ára afmæli Erasmus +. Í meira en áratug hefur LungA nýtt sér fjölbreytta styrki í æskulýðshluta Erasmus+ til að byggja upp fjölþjóðlega listahátíð og LungA skólann, sem er fyrsti lýðháskólinn á Íslandi. Þar er unnið út frá hugmyndafræðinni um styrkingu sjálfsins í gegnum listir og skapandi vinnu.
Áfram frábært starf hjá LungA
„Þessi misserin leggjum við mikla áherslu á uppbyggingu LungA Lab-sins eða málstofu LungA sem er afkvæmi samstarfsins við Erasmus+. LungA Lab er einhversskonar mini ráðstefna á LungA þar sem við stefnum á að vera með ennþá fleiri flotta alþjóðlega fyrirlesara og viðburði í tengslum við þema hátíðarinnar hverju sinni.“
„Þemað 2018 verður kyn eða “gender” og hlökkum við mikið til að bjóða almenningi inn í umræðuna um hvað kyn sé, hverjar hinar mismunandi birtingamyndir þess eru í samfélaginu og hvaða hlutverk það spili í lífum okkar. Þetta þema er einstaklega viðeigandi um þessar mundir en það verður spennandi að sjá hvaða vinklar koma upp á yfirborðið að þessu sinni,“ segir Björt.
