Tæplega 100 milljóna hagnaður Vopnafjarðarhrepps
Rekstur Vopnafjarðar var jákvæður um 97 milljónir króna í fyrra. Skuldahlutfall sveitarfélagsins er um 60% sem er með því besta á landinu.
Ársreikningur sveitarfélagsins var tekinn til fyrri umræðu á fundi sveitarstjórnar fyrir helgi. Samkvæmt bókun var hagnaður ársins 97 milljónir, þar af 44 milljónir úr A hluta.
Skuldir og skuldbindingar voru samanlagt 638 milljónir, þar af 565 milljónir í A-hlutanum. Skuldahlutfallið er 59,9% og hafði lækkað um tæp 3%. Samkvæmt reglum má það ekki vera meira en 150%.
Veltufé frá rekstri var 163 milljónir, þar af komu tæpar 90 milljónir úr A-hlutanum. Þessar tölur þýða að Vopnafjarðarhreppur er í hópi best stæðu sveitarfélaga landsins.
Til A-hluta telst starfsemi sem að hluta eða öllu leyti er fjármögnuð með skatttekjum. Hjá Vopnafjarðarhrepp er um að ræða aðalsjóð, en auk hans eignasjóð og þjónustumiðstöð.
Til B-hluta teljast fjárhagslega sjálfstæð fyrirtæki sem að hálfu eða meirihluta eru í eigu sveitarfélagsins, en rekstur þessara fyrirtækja er fjármagnaður með þjónustutekjum. Fyrirtæki sem falla undir B-hluta starfsemi sveitarfélagsins eru Hafnarsjóður, Vatnsveita, Fráveita, Félagslegar íbúðir, Leiguíbúðir aldraðra, Legudeildin Sundabúð, Lyfsala, Skiphólmi ehf. og Arnarvatn ehf.
Ársreikningurinn verður tekinn til annarrar umræðu í næstu viku.