„Þá er allt klárt áður en haldið er í fjallið“
Töluverðar umbætur hafa átt sér stað á skíðasvæðinu í Oddskarði sem opnað var um helgina í fyrsta skipti í vetur. Nýr snjótroðari hefur verið tekinn gagnið sem og aðgangshlið.
Ómar Skarphéðinsson, rekstrarstjóri skíðasvæðisins, segir að mikill munur sé að fá nýja troðarann, að hann sé mikið afl- og afkastameiri en sá sem fyrir var.
Aðgangskerfið nefnist Skidata og er sambærilegt því sem þekkist á helstu skíðasvæðum Evrópu. Viðskiptavinir fá kort sem hægt er að hlaða inn sem aðgangshliðið nemur þó svo það sé í vasa skíðafólks.
Rekstraraðilar Oddsskarðs telja kerfið byltingu í utanumhaldi gjaldtöku á skíðasvæðinu auk þess sem nýja kerfið veiti einnig góðar tölfræðiupplýsingar, svo sem dreifingu milli svæða, hvenær mesti straumurinn er og hvaðan gestir koma en allt gangast þetta í markaðsstarfi.
Ómar segir helstu breytinguna fyrir skíðafólk vera þá að nú verði hægt að kaupa ákveðinn klukkustundafjölda í stað þess að áður þurfti að kaupa heilan dag í senn. Einnig verði unnt að kaupa sig inn á sérstök svæði, til dæmis ef fullorðnir vilja vera á barnasvæðinu þá sé nú hægt að kaupa aðgang þar á sama verði og börn greiða.
Auk Oddskarðs mun Olís á Reyðarfirði koma til með að selja kort og áfyllingar. „Þetta er fyrirkomulag sem við ætlum að prófa í samstarfi við Olís á Reyðarfirði og kannski fleiri staði í framhaldinu. Þetta er ekki komið í gagnið en það gerist mjög bráðlega, en þá getur fólk komið við þar og keypt sér kort eða fyllt á – þá er allt klárt áður en haldið er í fjallið,“ segir Ómar.
Skíðasvæðið verður opið í dag frá 16:00-19:00 og svo aftur um helgina.