Stormur á Austurlandi: Leiðinni norður lokað
Vegagerðin hefur lokað veginum yfir Mývatns- og Möðrudalsöræfi um óákveðinn tíma. Meðalvindur þar er milli 20 og 30 metrar á sekúndu og vex heldur.
Í athugasemd veðurfræðings kemur fram að spáð sé mjög hvössum vindi á Austur- og Suðausturlandi um leið og kröpp lægð fer til suðurs skammt fyrir austan land.
Veðrið nær hámarki á milli klukkan þrjú og níu. Hríðarkóf verður norðaustanlands fram eftir degi og veðurhæð á Austfjörðum og Héraði allt að 23-28 m/s, en ekki snjókoma að ráði þar.
Hviður verða allt að 35-45 m/s. suðaustanlands, einkum frá Suðursveit og í Berufjörð þar sem búast má við hviðum allt að 40-50 m/s.