Starfsmenn SVN mættu COVID með þrautseigju
Gunnþór Ingvason forstjóri Síldarvinnslunnar (SVN) segir í áramótaávarpi sínu að starfsmenn fyrirtækisins hafi á liðnu ári mætt áskorunum vegna COVID með þrautseigju. Í ávarpinu fjallar Gunnþór auk þess um náttúruhamfarirnar í heimabæ sínum Seyðisfirði og komandi alþingiskosningar.„Faraldurinn hefur haft áhrif á starfsemi og rekstur Síldarvinnslunnar líkt og flestra annarra fyrirtækja. Við störfum á alþjóðlegum mörkuðum og seljum afurðir okkar til fjölmargra landa. Við höfum þurft að aðlaga framleiðslu og sölu á afurðum í takt við breytingar á eftirspurn á mörkuðum. Sumir markaðir nánast hurfu á meðan aðrir höktu, höggið er mikið á mörkuðum fyrir fisk sem fer á veitinga- og gististaði í helstu ferðaþjónustulöndunum,“ segir Gunnþór í ávarpinu sem finna má á vefsíðu SVN.
„Starfsmenn Síldarvinnslunnar hafa mætt þessum áskorunum með þrautseigju. Þeir hafa allir lagst á eitt og samstaðan hefur verið aðdáunarverð. Starfsmenn hafa þurft að færa miklar fórnir þegar þeir hafa sinnt ýmsum tilmælum. Skerða hefur þurft samgang starfsmanna og vina. Sjómenn hafa tekið á sig fórnir í lengri útiverum. Starfsmenn hafa fórnað ferðalögum. Það hafa allir lagt sitt af mörkum.“
Trúverðugar varnir fyrir Seyðfirðinga
Gunnþór fjallar einnig um skriðuföllin á Seyðisfirði en Síldarvinnslan er langstærsta fyrirtæki bæjarins.
„Heimabærinn minn lenti í náttúruhamförum rétt fyrir jól, þar sem fólk þurfti að yfirgefa heimili. Guðs blessun var að engin slys urðu á fólki. Ég óska þess að á nýju ári komi fram trúverðugar áætlanir um varnir fyrir Seyðfirðinga þannig að þeir geti fundið ró í sínum fallega heimabæ, sem ég tel að sé fegursti bær landsins,“ segir Gunnþór.
Gunnþór fjallar einnig um komandi alþingskosningar og segir að í aðdraganda slíkra kosninga beri málefni sjávarútvegs iðulega á góma.
„Þjóðhagslegt mikilvægi sjávarútvegs hefur sannað sig á árinu og enn og aftur kemur í ljós að öflugur sjávarútvegur er þjóðhagslega mikilvægur. Við eigum að sameinast um að tryggja að þessi þjóðarauðlind okkar geti verið undirstaða lífskjara í landinu. Þrátt fyrir að oft og iðulega sé tekist á um málefni greinarinnar, hef ég fulla trú á því að á komandi ári munum við fá uppbyggilega og málefnalega umræðu um málefni sjávarútvegsins. Pólitíkusum allra flokka er velkomið að heimsækja Síldarvinnsluna og kynna sér starfsemi hennar á komandi ári,“ segir Gunnþór.
Í lokaorðum sínum segir Gunnþór að hann hafi oft sagt að árangur Síldarvinnslunnar megi þakka framúrskarandi starfsfólki og öflugum samfélögum sem fyrirtækið starfar í. Það hafi sannað sig enn og aftur á árinu 2020.
