Spennt að halda áfram nýjungum í skólastarfinu
Lilja Guðný Jóhannesdóttir hefur verið skipuð skólameistari Verkmenntaskóla Austurlands. Lilja hefur starfað í skólanum síðustu ár og segist spennt fyrir starfinu.„Starfið leggst gífurlega vel í mig. Við höfum farið af stað með mikið af nýjungum á síðustu árum og það verður mitt stærsta viðfangsefni, að fylgja eftir þeim spennandi verkefnum,“ segir Lilja Guðný.
Þar má nefna FabLab smiðjuna en Lilja Guðný starfaði við hana árin 2014-2016. Hún segir að undir hana þurfi að skjóta styrkari stoðum fjárhagslega til að tryggja að smiðjan haldist opin fyrir almenning og nemendur af öllum skólastigum.
Eins bendir Lilja á nýtt dreifnám í rafvirkjun, vélvirkjun og vélstjórn sem fer af stað í haust. Námið er verkefnabundið og ráða nemar námshraða sínum sjálfir og verða smiðjur opnar utan dagvinnutíma til að koma á móts við nemendur úr atvinnulífinu.
Þá er verið að bíða eftir vottun menntamálaráðuneytisins á nýrri námsbraut til stúdentsprófs, nýsköpunar- og tæknibraut, sem búið er að kenna á í tvö ár og námsbraut í fiskeldi.
Lilja er skipuð í embættið til fimm ára frá og með morgundeginum en hún sótti ein um starfið. Lilja Guðný hefur lokið M.Ed. námi frá Háskóla Íslands, auk viðbótarnáms í stjórnun og mati menntastofnana frá sama skóla. Hún hefur víðtæka kennslureynslu á grunn- og framhaldsskólastigi, auk þess sem hún hefur sinnt kennslu í framhaldsfræðslu.