Smali á fjórhjóli slasaðist eftir að hafa keyrt ofan í skurð
Smali á fjórhjóli slasaðist við að detta af hjólinu eftir að hafa ekið ofan í skurð. Í Neskaupstað valt bifreið eftir að ökumaðurinn misreiknaði sig þegar hann var að snúa við.Þetta er meðal þess sem fram kemur í dagbók lögreglunnar fyrir síðustu viku.
Fjórhólaslysið varð í Fellum þar sem verið var að smala fé í Ormsstaðarétt. Skurðurinn var gróinn og sást illa en smalinn keyrði ofan í hann og kastaðist af hjólinu. Hann var fluttur með sjúkrabíl til læknis og reyndist hafa slasast á baki.
Á Egilsstöðum var ekið á mannlausa bifreið. Ökumaðurinn stakk af en vitni var að atviknu. Haft var uppi á ökumanninum sem játaði brot sitt.
Í Neskaupstað varð umferðaróhapp þegar ökumaður var að snúa bíl sínum við Urðarteig. Bíllinn fór fram af vegbrún, rann niður gil og valt. Ökumaðurinn sagðist hafa misreiknað sig í myrkrinu. Hann var í belti og slasaðist ekki að öðru leyti en því að hann var marinn eftir beltin.
Fíkniefni fundust í bifreið erlends ferðamanns við komu Norrænu til Seyðisfjarðar. Um er að ræða lítið magn og viðurkenndi maðurinn brot sitt.
Lögregla var kölluð til vegna slagsmála á Eskifirði en báðir aðilarnir voru talsvert við skál. Annar þeirra hlaut minniháttar skurð á höfði og taldi sig hafa orðið fyrir líkamsárás.
Þá hefur lögreglan á Austurlandi eftirlit með rjúpnaveiðum og hvetur skotveiðimenn til að hafa skotvopnaskírteini og veiðikort meðferðis þegar haldið er til veiða.
