Smalar fluttir til Loðmundarfjarðar með varðskipi
Fjórir smalar og þrír smalahundar voru á laugardag fluttir með varðskipinu Tý frá Seyðisfirði til Loðmundarfirði. Talsvert hefur verið af fé í firðinum í vetur sem ekki tókst að smala í haust. Sumar kindanna hafa jafnvel hafst þar við lengur.Í frétt frá gæslunni kemur fram að siglingin hafi gengið vel en smalarnir fóru í land með léttbát Týs. Þótt lendingin væri ekki sem best gekk vel að koma hópnum í land.
Þeir fóru úr firðinum á móts við vélsleðamenn sem komu frá Egilsstöðum til að hjálpa þeim að reka féð. Að því er fram kemur í frétt RÚV gekk vel að smala og var komið heim með um 80 kindur.
Týr er þessa dagana eystra við eftirlit með loðnuveiðum. Varðskipsmenn fóru meðal annars um borð í erlend loðnuveiðiskip í síðustu viku.
Mynd: Landhelgisgæslan