Skuldir hæstar á íbúa á Fljótsdalshéraði
Skuldir eru hæstar á hvern íbúa miðað við tekjur á Fljótsdalshéraði sé horft til stærstu sveitarfélaga landsins. Heldur horfir til þrengri tíðar í fjármálum sveitarfélaga á landsvísu.
Þetta kemur fram í nýlegri úttekt tímaritsins Vísbendingar um fjármál sveitarfélaga. Skuldir á hvern íbúa Fljótsdalshéraðs eru rúmar 2,4 milljónir króna en tekjurnar tæplega 1,1 milljón. Hlutfallið er því 224%.
Næst hæst er hlutfallið í Reykjanesbæ 216%. Fleiri af stærstu sveitarfélögum landsins svo sem Hafnarfjörður, Reykjavík og Kópavogur fylgja þar á eftir.
Fjarðabyggð er hitt austfirska sveitarfélagið á listanum. Skuldirnar eru þar tæpar 1,7 milljónir á hvern íbúa, tekjurnar tæpar 1,25 milljónir og hlutfallið því 134%.
Vísbending tekur árlega saman lista yfir draumasveitarfélagið en einkunn þar byggir á fjárhagslegum mælikvörðum. Betra telst að vera með lægri útsvarsprósentu, íbúaþróun af að vera jákvæð, veltuhlutfall gott og skuldir sem minnstar.
Fljótsdalshérað er í 34. sæti af 36 með einkunnina 2,7 og fellur verulega á milli ára. Fjarðabyggð er í tíunda sæti með einkunnina 6,5 og hækkar sig lítillega, öfugt við flest sveitarfélög á listanum. Neðst er Skagafjörður með 2,4 í einkunn en Vestmanneyjar efstar með 8,2.
Bæjarstjórn Fljótsdalshéraðs samþykkti fjárhagsáætlun næsta árs fyrr í mánuðinum. Samkvæmt henni er gert ráð fyrir jákvæðri afkomu sveitarfélagsins næstu fjögur ár. Veltufé frá rekstri mun nema þremur milljörðum og verða tveir þeirra nýttir í afborganir lána.
Áætlað er að skuldahlutfall verði í lok þessa árs 185% en 131% í lok árs 2020. Afgangur á næsta ári er áætlaður 220 milljónir.