Skora á Norðlenska að hækka verð til sauðfjárbænda
Formenn fjögurra félaga sauðfjárbænda í Norðausturkjördæmi hafa sent stjórnendum Norðlenska áskorun um að hækka verð til sauðfjárbænda. Þeir telja að þær forsendur sem gefnar voru í upphafi sláturtíðar fyrir lækkun afurðaverð haldi ekki.Þetta kemur fram í ályktuninni sem formennirnir sendu frá sér fyrir helgi. Norðlenska lækkaði verð til bænda, líkt og aðrir sláturleyfishafar, annað árið í röð og sagði það vegna lægra verðs í útflutningi og verri birgðastöðu.
Formennirnir segja að ekkert í birgðastöðu eins og hún blasti við í upphafi sláturtíðar réttlæti svo afgerandi lækkun afurðaverðs. Því sé óásættanlegt að rekstrargrundvöllur lambakjötsframleiðslu sé að full og öllu brostinn á svæðinu.
Afleiðingarnar af því séu stórfellt hrun í greininni, greiðslufall og fjöldagjaldþrot sauðfjárbúa með tilheyrandi byggðaröskun og harmleikjum fjölda fjölskyldna.
Slíkt hrun hefði neikvæð áhrif á aðra framleiðendur á innlendum kjötmarkaði og afurðafyrirtækin sjálf. Um leið og stjórnendum Norðlenska er þakkað fyrir metnað í vöruþróun og framsetningu er skorað á þá að standa með sauðfjárbændum, sýna metnað og taka ábyrgð með að hækka verð þegar í stað.
Á fundi með austfirskum sauðfjárbændum í lok ágúst sagði Ágúst Torfi Hauksson, framkvæmdastjóri Norðlenska, að bændum yrðu látnir njóta þess eftir sláturtíð ef útkoman yrði góð.