Skemmdir eftir mikla vatnavexti um helgina
Úrhellisrigning víða um Austurland á laugardag olli miklum vatnavöxtum í fjórðungnum. Rafmagnsstrengur fór í sundur í Fljótsdal og aurskriða lokaði hringveginum í Berufirði um tíma.Í annað skiptið á fáeinum dögum hækkaði vatnsborð í ám í Djúpavogshreppi um tvo metra á örfáum tímum í úrhellisrigningu á laugardag. Heimamenn þar segja að rignt hafi linnulaust frá föstudagskvöldi til hádegis á sunnudegi.
Á laugardag féll skriða á Hringveginn innan við Búlandsá í Berufirði og lokaði honum. Í Hamarsfirði var allt á floti og lá vatnið í gólfi brúarinnar yfir Hamarsá. Myndir og myndbönd frá helginni má sjá á heimasíðu Djúpavogshrepps.
Rafmagnslaust varð í gærmorgun í Fljótsdal og Skriðdal eftir að strengur fór í sundur í vatnavöxtum í Kelduá. Um hádegi var búið að einangra svæðið sem bilunin hafði áhrif á og koma rafmagni víða á aftur.
Jökulsá í Fljótsdal óx hátt í metra á fjórum tímum og náði hámark um það bil sem Fljótsdælingar byrjuðu að rétta í Melarétt.
Vatnavextir og þoka setti göngur í Breiðdal úr skorðum. Á Gilsá mældist sólarhringsúrkoman 110 mm frá laugardegi til sunnudags.
Rigningunni er síður en svo lokið þótt hlé sé á henni um stundarsakir. Veðurstofan hefur gefið út viðvörun um rigningu á Suðausturlandi og sunnanverðum Austfjörðum á morgun. Mismikil rigning er í veðurkortunum eystra svo langt sem þau ná.
