„Sjóðurinn mikil lyftistöng fyrir okkar afreksfólk“
Reglugerð fyrir Afrekssjóð Guðmundar Bjarnasonar var undirrituð í vikunni af þeim Gunnþóri Ingvasyni framkvæmdastjóri Síldarvinnslunnar og Stefáni Má Guðmundssyni formanni Íþróttafélagsins Þróttar í vikunni, en samþykkt var á aðalfundi Síldarvinnslunnar í fyrra að stofna sjóðinn og skyldi Síldarvinnslan árlega veita honum eina milljón króna til ráðstöfunar.
Sjóðurinn er stofnaður í minningu Guðmundar Bjarnasonar sem lést á síðasta ári. Guðmundur var formaður Þróttar á árunum 1984 til 1987 og formaður knattspyrnudeildar félagsins á árunum 1976-1985. Þá sat Guðmundur í stjórn Knattspyrnusambands Íslands á árunum 1978-1991. Sæti í stjórn Síldarvinnslunnar átti Guðmundur á árunum 1991-2005 auk þess sem hann sat í stjórn Samvinnufélags útgerðarmanna frá 1984 til dauðadags en stjórnarformaður félagsins var hann frá 2005. Guðmundur gegndi starfi bæjarstjóra, fyrst í Neskaupstað og síðan í Fjarðabyggð, á árunum 1991-2006.
„Afrekssjóðurinn verður fyrir íþróttaiðkendur, 14 ára og eldri og verður sjóðurinn mikil lyftistöng fyrir okkar afreksfólk sem oft velst í krefjandi og kostnaðarsöm verkefni á borð við úrvalshópa tengda landsliðum verkefni. Að hafa aðgang að styrkjum á borð við þessa skiptir því verulegu máli,“ sagði Stefán Már í samtali við Austurfrétt.
Stjórn Íþróttafélagsins Þróttar ásamt einum fulltrúa frá Síldarvinnslunni skipa sjóðsstjórnina. Tilgangur sjóðsins er að styrkja einstaklinga innan Þróttar sem náð hafa framúrskarandi árangri í íþrótt sinni. Á það við þegar viðkomandi hefur öðlast rétt til keppni á fjölþjóðlegum mótum, verið valinn í landslið, unnið Íslandsmeistaratitil, sett Íslandsmet eða skarað fram úr með eftirtektarverðum hætti. Sækja þarf um styrk úr sjóðnum og er gert ráð fyrir að styrkjum verði úthlutað tvisvar á ári.
Ljósm: Smári Geirsson. Frá vinstri, Gunnþór Ingvason og Stefán Már Guðmundsson við undirritun reglugerðar um Afreksmannasjóð Guðmundar Bjarnasonar.