Sjávarútvegurinn er og verður ávallt máttarstólpi landsbyggðarinnar – Myndir
Óumdeilt er að núverandi fyrirkomulag fiskveiða hafi umbylt sjávarútveginum og byggt undir þá undirstöðugrein sem sjávarútvegurinn er íslensku samfélagi. Mikilvægi hans mælist ekki bara í greinum störfum.
Þetta sagði Þorsteinn Víglundsson, framkvæmdastjóri Samtaka atvinnulífsins, sem hélt hátíðarræðuna á Eskifirði á sjómannadaginn.
Þorsteinn benti á að rekstrarumhverfi sjávarútvegsins hefði tekið stakkaskiptum á undanförnum árum. Í stað þess að reglulega sé verið að bjarga rekstri fyrirtækja í greininni byggi fyrirtæki í öðrum greinum svo sem verslun, þjónustu, verkfræði og rannsóknum á sjávarútveginum.
„Greinin er því miklu mikilvægari en því sem mælist í beinum störfum, veltu eða skattgreiðslum,“ sagði Þorsteinn.
„Velferð þjóðar hvílir á getur til að skapa sér gjaldeyri og það er hvergi ljósara en á stöðum eins og hér. Sjávarútvegurinn er og verður máttarstólpi landsbyggðarinnar. Til þess verður að tryggja stöðugt og hagstætt rekstrarumhverfi.“
Hann sagði að eftir óvissutímabil lítilla fjárfestinga í greininni hefði hún tekið við sér eins og glöggt sést á Eskifirði þar sem Eskja reisir nýtt frystihús.
Ekki gangi að á ný myndist óvissa um framtíð sjávarútvegsins. „Það er óumdeilt að núverandi fyrirkomulag fiskveiða hefur umbylt og byggt undir þá undirstöðu sem sjávarútvegurinn er.
Því verður ekki mótmælt að greiða kostnað við að halda uppi hagsmunum greinarinnar og landsins en það er óðlegt að sjávarútvegsfyrirtæki greiði hærri gjöld en önnur fyrirtæki sem nýta auðlindir landsins.“
Hann kallaði eftir átaki í öryggi starfsfólks í fiskvinnslu. Slíkt hefði verið gert í skipunum og mikill árangur náðst.
Hátíðadagskráin var fjölbreytt á Eskifirði að vanda. Árbjörn Magnússon fékk heiðursviðurkenningu sjómannadagsins en hann hefur gegnt fjölbreyttum störfum á sjó, verið háseti, matsveinn og stýrimaður á skipum frá Eskifirði.
Hann fór fyrst til sjós 15 ára gamall en var lengst af á Hólmatindinum. Skipstjóri var hann á því skipi frá 1978 þar til skipið var selt árið 2001 og svo skipstjóri á Hólmanesi þar til hann hætti á sjó árið 2003.
Myndir: Kristinn Þór/Visit Eskifjordur
